7 imputados polo desaloxo da Insumisa

 Finaliza a instrución do xuízo polos feitos relativos ao desaloxo do Centro Social Okupado A Insumisa con sete imputados por delitos de “desordes públicos”, “atentado”, “lesións” e “danos agravados”. Finalmente caen do proceso os cargos de “sedición” que pesaban sobre varios dos procesados. Con todo, a pesar das reiteradas peticións da defensa, non se conseguiu separar en dúas causas diferenciadas os feitos sucedidos durante o desaloxo dos danos sufridos polo local de Marea Atlántica tres días máis tarde. Finalmente ambos sucesos, a pesar de ser evidentemente distintos, compartirán un mesmo xuízo, asimilando o xulgado a tese de que todo sería unha mesma trama criminal.
 Os feitos remóntanse ao 23 de maio do 2018, cando o goberno “do cambio” da Coruña (daquela no concello) ordenou o desaloxo do C.S.O. A Insumisa, situado en terreos municipais. A pesar de faltar un día para o vencemento do prazo legal para desaloxar o inmoble, a policía local asaltou a okupa aproveitando un momento no que ninguén se atopaba no interior. A contestación cidadá non se fixo esperar, axiña un nutrido grupo de activistas concentrouse ás portas do edificio. Aproveitando o escaso número de axentes que protexían a entrada, xs manifestantes trataron de acceder os terreos da okupa. A desproporcionada resposta dos policías, que cargaron con porras extensibles e gases lacrimóxenos, provocou múltiples lesión: unha persoa precisou 12 puntos de sutura e outra tres, outro pasou a noite en observación hospitalaria e moitxs sufrirón feridas e contusións.
 Por mor da desproporción da carga, un manifestante respostou co pau a súa bandeira contra un policía. As dilixencias xudiciais non recollen consecuencias médicas nin baixa laboral por este feito, pero aida así o responsable ingresou en prisión preventiva durante unha semana e enfronta agora cargos por “desordes públicos, atentado e lesións”. Finalmente retiaron a absolutamente absurda imputación por “sedición” que nun principio pretendían achacarlle e que ocasionou a súa breve estancia no cárcere.
 A desproporción da carga policial contra manifestantes coas mans en alto non é unha cuestión especulativa, pódese apreciar á perfección nos múltiples vídeos do suceso que circulan polas redes. Con todo o auto xudicial desvirtúa completamente os feitos para presentalos de forma inversa, como a tímida defensa policial perante a violencia dos okupas.
 Pola tarde, xa cos antidisturbios defendendo o espazo, producíronse novas cargas que o xulgado volve atribuír ao lanzamento de obxectos, pero que outra vez son desmentidas por multitude de documentos audiovisuais, coma este de Galiza Contrainfo:
 Unha persoa que se apartou do continxente de manifestantes para mexar foi detida por varios policías e posteriormente apaleada no chan. Ademais da malleira, levou para casa varias denuncias falsas por inexistentes agresións a madeiros (esta vez acompañadas por partes de lesións e fraudulentas baixas laborais). Agora enfronta unha dificil situación que podería levalo o cárcere. As súas denuncias por maltrato policial, como non podía ser doutro xeito, foron inmediatamente desestimadas.
 Por mor destes sucesos dúas persoas quedan agora imputadas por “desordes públicos, atentado e lesións” e outras tres por “desordes públicos e atentado”. Bonito saldo para un desaloxo ilegal no que os manifestantes recibiron unha auténtica malleira.
 Tres días máis tarde, na madrugada do 26 de maio, data da manifestación de repulsa contra o desaloxo, a sede de “Marea Atlántica” amencía esnaquizada por unha decena de encapuchados, que rebentaron as súas vidreiras e a persiana metálica a pedradas e mazazos. Por mor destes feitos outras dúas persoas fican agora imputadas por danos agravados, o que pode carrexar penas de ata tres anos de cárcere.
 Contra a finalización da instrución do proceso, acordada agora polo xulgado de instrución Nº6, as defensas presentaron un novo recurso do que aínda non temos noticias.
 Seguiremos informando.

One comment on “7 imputados polo desaloxo da Insumisa

Leave a comment